ಪ್ಲಾಸ್ಟಿಕ್ ಫುಡ್ !


ಮೊನ್ನೆಯಿಂದ ಟೀವಿಯಲ್ಲಿ ಪ್ಲಾಸ್ಟಿಕ್ ಫುಡ್ ನದ್ದೇ ಕಾರುಬಾರು. ಮೊದಲು ನಾನು ಟೀವಿಯಲ್ಲಿ ನೋಡಿದಾಗ ಪ್ಲಾಸ್ಟಿಕ್ ಕ್ಯಾಬೇಜನ್ನು ಹೇಗೆ ತಯಾರಿಸಿ ಅದನ್ನು ಮಾರುತ್ತಾರೆ ಎಂಬುದನ್ನು ಒಬ್ಬಾತ ಪ್ರಾತ್ಯಕ್ಷಿಕೆ ಮುಖಾಂತರ ತೋರಿಸುತ್ತಿದ್ದ. ಹಿಂದಿನ ದಿನವೇ ನಾನು ಸೂಪರ್ ಮಾರ್ಕೆಟ್ನಿಂದ ಕ್ಯಾಬೇಜ್ ಖರೀದಿಸಿದ್ದೆ. ಹಾಗಾಗಿ ಆತಂಕದಿಂದ ಓಡಿ ಹೋಗಿ ಫ್ರಿಜ್ ನಲ್ಲಿದ್ದ ಕ್ಯಾಬೇಜನ್ನು ಹೊರ ತೆಗೆದು ಪರಿಶೀಲಿಸಿದೆ. ನನಗೇನೂ ಅದು ಪ್ಲಾಸ್ಟಿಕ್ ತರಹ ಕಾಣಲಿಲ್ಲ. ಆದರೂ ಖಚಿತ ಪಡಿಸಿಕೊಳ್ಳಲು ಅದರ ಒಂದು ಪದರನ್ನು ತುಂಡು ಮಾಡಿ ಮೂಸುತ್ತ ಬಾಯಿಗಿಟ್ಟೆ. ಕ್ಯಾಬೇಜ್ ರುಚಿ ಬಾಯಿ ತುಂಬಾ ಹರಡುತ್ತಿದ್ದಂತೆ ಅಬ್ಬಾ ನಾನು ತಂದಿದ್ದು ಕ್ಯಾಬೇಜೆ ಅಂತ ಖಾತ್ರಿಯಾಗಿ ಸಮಾಧಾನವಾಯಿತು. ಆದರೂ ಸಮಾಧಾನವಾಗದೇ ಅಂತರ್ಜಾಲದಲ್ಲಿ ಈ ಬಗ್ಗೆ ಜಾಲಾಡಿದಾಗ ಅದೆಲ್ಲ ಸುಳ್ಳು ಎಂದು ತಿಳಿಯಿತು.

ಮರುದಿನ ಟೀವಿಯಲ್ಲಿ ಬೆಂಗಳೂರಿಗೆ ಪ್ಲಾಸ್ಟಿಕ್ ಅಕ್ಕಿ ಬಂದಿದೆ ಎಂದು ಸುದ್ದಿ ಪ್ರಸಾರವಾಯಿತು. ಜೊತೆಗೆ ಜನರು ಅನ್ನಮಾಡಿಕೊಂಡು ಊಟಕ್ಕೆ ಕುಳಿತುಕೊಂಡು ಊಟ ಮಾಡುವ ಬದಲು ಅನ್ನವನ್ನು ಉಂಡೆಗಳನ್ನಾಗಿ ಮಾಡಿ ಚೆಂಡಿನಂತೆ ಅದನ್ನು ಗೋಡೆಗೆ ಬಡಿಯುತ್ತ ಅದು ಪುಟಿದು ವಾಪಾಸು ಬರುವುದನ್ನು ತೋರಿಸುತ್ತ ಅದು ಪ್ಲಾಸ್ಟಿಕ್ ಅಕ್ಕಿ ಎಂದು ವಿವರಿಸುತ್ತಿದ್ದರು. ಅದನ್ನು ನೋಡಿ ನನಗೆ ನಗಬೇಕೋ ಅಳಬೇಕೋ ತಿಳಿಯಲಿಲ್ಲ. ಪ್ಲಾಸ್ಟಿಕ್ ಅಕ್ಕಿಯಾದರೆ ಅದು ಮೇಲಕ್ಕೆ ಬಂದು ತೇಲುವುದಿಲ್ಲವೇ, ಅಕ್ಕಿ ಕುದಿಯುತ್ತಿರುವಾಗಲೇ ಬಿಸಿಗೆ ಕರಗುವುದಿಲ್ಲವೇ, ಪ್ಲಾಸ್ಟಿಕ್ ವಾಸನೆ ಬರುವುದಿಲ್ಲವೇ ಇಂಥ ಆಲೋಚನೆ ಯಾರಿಗೂ ಯಾಕೆ ಬಂದಿಲ್ಲ. ಟೀವಿಯವರು ಜನರ ಗೊಂದಲ ಹೋಗಲಾಡಿಸಲು ಆಹಾರ ತಜ್ಞರನ್ನು ಕರೆಸಿ ಈ ಬಗ್ಗೆ ಗಹನವಾದ ಚರ್ಚೆ ಮಾಡಿಸಿದ್ದೂ ಆಯಿತು. ಅವರು ಅದು ಪ್ಲಾಸ್ಟಿಕ್ ಅಕ್ಕಿಯಲ್ಲ ಎಂದು ಅದನ್ನು ಚೆನ್ನಾಗಿ ಪರಿಶೀಲಿಸಿ ಅನ್ನಬೆಂದ ಮೇಲೆ ಅದರಲ್ಲಿ ಗಾಳಿ ಸೇರುತ್ತದೆ ಜೊತೆಗೆ ಪಿಷ್ಟವೂ ಅಧಿಕವಾಗಿ ಇರುವುದರಿಂದ ಹಾಗಾಗುತ್ತದೆ ಎಂದು ತಿಳಿ ಹೇಳಿದರೂ ಅವರ ಮಾತು ಕೇಳುವವರೇ ಇಲ್ಲ!

ನಾನೂ ಊಟ ಮಾಡುವಾಗ ತಮಾಷೆಗೆ ಟೀವಿಯಲ್ಲಿ ಕಂಡಂತೆ ಅನ್ನವನ್ನು ಉಂಡೆ ಕಟ್ಟಿ ತಟ್ಟೆಯಲ್ಲೇ ಸ್ವಲ್ಪ ಮೇಲಿಂದ ಕೆಳಕ್ಕೆ ಎಸೆದೆ. ಅದು ಪಚಕ್ಕನೆ ಬಿದ್ದು ಮುದ್ದೆಯಾಗಿ ಬಿಟ್ಟಿತು. ನನ್ನನ್ನೇ ಗಮನಿಸುತ್ತಿದ್ದ ನಮ್ಮ ಮಕ್ಕಳೆಲ್ಲ ಒಬ್ಬೊಬ್ಬರೇ ಉಂಡೆ ಕಟ್ಟಿ ಪ್ರಯೋಗ ಮಾಡಲು ಸಿದ್ಧರಾದರು. ಇನ್ನು ಇವರೆಲ್ಲ ಸಿಕ್ಕ ಸಿಕ್ಕ ಗೋಡೆಗೆಲ್ಲ ಬಡಿದರೆ ಗೋಡೆಗಳ ಸೌಂದರ್ಯ ಹಾಳಾಗುತ್ತದೆ, ಜೊತೆಗೆ ಪೇಯಿಂಟ್ ಖರ್ಚು ಬೇರೆ ಎಂದುಕೊಳ್ಳುತ್ತ ಮಕ್ಕಳಿಗೆ ಗದರಿಸಿ ಸುಮ್ಮನೆ ಊಟ ಮಾಡುವಂತೆ ಹೇಳಿದೆ. ಆದರೂ ಮೊದಲು ಶುರು ಮಾಡಿದ್ದು ನಾನು ಎಂಬ ಅಪರಾಧಿ ಪ್ರಜ್ಞೆ ನನ್ನನ್ನು ಕಾಡತೊಡಗಿತು.

ಅಷ್ಟರಲ್ಲಿ ಪ್ಲಾಸ್ಟಿಕ್ ಮೊಟ್ಟೆಯ ಬಗ್ಗೆಯೂ ವರದಿ ಬರತೊಡಗಿತು. ಮೊಟ್ಟೆಯ ಸಿಪ್ಪೆಯ ಪದರನ್ನು ತೆಗೆದು ಅದಕ್ಕೆ ಬೆಂಕಿ ಹಚ್ಚುತ್ತ ನೋಡಿ ಇದು ಪ್ಲಾಸ್ಟಿಕ್ ಎಂದು ಅವರು ವಿವರಿಸುವಾಗ ನನಗೆ ತುಂಬಾ ನಗು ಬಂದಿತು. ಸಕ್ಕರೆಯಲ್ಲೂ ಪ್ಲಾಸ್ಟಿಕ್ ಸಕ್ಕರೆ ಇದೆಯೆಂದು ತೋರಿಸುತ್ತಿದ್ದರು. ಆಹಾರ ತಜ್ಞರು ಎಷ್ಟೇ ಬರಿ ಅದನ್ನು ವಿವರಿಸಿ ಹೇಳಿದರೂ ಜನ ನಂಬುವ ಸ್ಥಿತಿಯಲ್ಲೇ ಇಲ್ಲ. ಅದೆಷ್ಟು ಜನ ತಾವು ತಂದ ಅಕ್ಕಿ ಸಕ್ಕರೆ ಮೊಟ್ಟೆಗಳನ್ನು ಹೊರಕ್ಕೆಸೆದರೋ ದೇವರೇ ಬಲ್ಲ.

ನಮ್ಮ ವಠಾರದ ಕೆಲವು ಮನೆಗಳಲ್ಲಿ ಅನ್ನದಿಂದ ಮಾಡಿದ ಚೆಂಡುಗಳನ್ನು ನೋಡಿ ಮಕ್ಕಳಿಗೆ ಖುಷಿಯೋ ಖುಷಿ. ಹಿರಿಯರೆಲ್ಲ ಆತಂಕದಲ್ಲಿರುವಾಗ ಮಕ್ಕಳೆಲ್ಲ ಅನ್ನದ ಚೆಂಡುಗಳನ್ನು ತೆಗೆದುಕೊಂಡು ಕ್ರಿಕೆಟ್ ಆಡಲು ಓಡಿದರು. ಮೊದಲೆಲ್ಲ ಒಂದು ಚೆಂಡು ಕೊಡಿಸು ಎಂದು ಅಂಗಲಾಚಿದರೂ ಎಲ್ಲಿ ಮಕ್ಕಳು ಅಕ್ಕಪಕ್ಕದ ಮನೆಯ ಕಿಟಕಿ ಗಾಜುಗಳನ್ನು ಒಡೆಯುತ್ತಾರೋ ಎಂಬ ಭಯದಿಂದ ಮನೆಯವರು ಕೊಡಿಸುತ್ತಿರಲಿಲ್ಲ. ಈಗ ಅನ್ನದಿಂದ ಮಾಡಿದ ಮೆತ್ತನೆಯ ಬಾಲ್ ಸಿಕ್ಕಿದ್ದು ಮಕ್ಕಳಿಗೆ ನಿಧಿ ಸಿಕ್ಕಿದ ಹಾಗಾಯಿತು. ಆದರೂ ರಜೆ ಮುಗಿದು ಶಾಲೆ ಶುರುವಾದ ಮೇಲೆ ಸಿಕ್ಕಿತಲ್ಲ ಮೊದಲೇ ಸಿಕ್ಕಿದ್ದರೆ ಅದೆಷ್ಟು ಮ್ಯಾಚುಗಳನ್ನು ಆಡಬಹುದಿತ್ತು ಎಂದು ಪರಿತಪಿಸಿದರು. ಅದರ ಜೊತೆಗೆ ತಮ್ಮ ಅಮ್ಮಂದಿರಿಗೆ ಅಕ್ಕಿಯನ್ನು ಚೆಲ್ಲದೇ ಹಾಗೆ ತೆಗೆದಿರಿಸಲು ತಾಕೀತು ಮಾಡಿದರು. ಕೆಲವು ಯುವಕರು ರೈಸ್ ಕ್ರಿಕೆಟ್ ಬಾಲ್ ತಯಾರಿಸಿ ಹೊಸ ಸ್ಟಾರ್ಟ್ ಅಪ್ ಬ್ಯುಸಿನೆಸ್ ಮಾಡುವ ಕನಸು ಕಾಣತೊಡಗಿದರು.

Advertisements

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s